ເຊື່ອມຕໍ່ເຄືອຂ່າຍໄຣ້ສາຍ WPA ໃນ Windows XP SP1

ດ້ວຍຄວາມບັງເອີນອັນເຈດຕະນາໄວ້ແລ້ວ ມີແຂກມາພັກຢູ່ຫ້ອງ ແລະເຂົາມີ Notebook ທີ່ໃຊ້ Windows XP SP1 ເຊິ່ງໂດຍທົ່ວໄປແລ້ວ ຈະບໍ່ຮອງຮັບການເຂົ້າລະຫັດແບບ WPA ຈະໃຊ້ໄດ້ສະເພາະ WEP ເທົ່ານັ້ນ ແຕ່ວ່າຢູ່ທີ່ຮ້ານພັດໃຊ້ລະບົບຮັກສາຄວາມປອດໄພເປັນ WPA-PSK (Wi-Fi Protected Access Pre-Shared Key) ຫາກໃຊ້ Windows XP SP1 ເຊື່ອມຕໍ່ຫາ Access Point ທີ່ເປີດລະບົບ WPA-PSK ແລ້ວ ກໍ່ຈະບໍ່ສາມາດເຊື່ອມຕໍ່ໄດ້ ລະບົບຈະສະແດງຂໍ້ຄວາມວ່າ ລະຫັດຜ່ານບໍ່ຖືກຕ້ອງ ເນື່ອງຈາກມັນເຂົ້າໃຈວ່າກຳລັງເຊື່ອມຕໍ່ໄປທີ່ Access Point ທີ່ໃຊ້ WEP

ການແກ້ໄຂບັນຫານີ້ໃນເບື້ອງຕົ້ນກໍ່ຄິດວ່າ ຄົງຈະຕ້ອງໄດ້ອັບເກຣດໄປໃຊ້ Service Pack 2 ແຕ່ວ່າ ກໍ່ເປັນໄປໄດ້ຍາກ ເນື່ອງຈາກເປັນຄອມຂອງລູກຄ້າຫ້ອງພັກ ມັນກໍ່ເບິ່ງຄືຈະເປັນການຂີ່ຊ້າງຈັບຕັກກະແຕນເກີນໄປ ກໍ່ເລີຍຕ້ອງ Googling ຊອກຫາ Workaround ດ່ວນ ແລະໄດ້ຄວາມວ່າ ຕ້ອງລົງ Hotfix KB826942 ເຊິ່ງສາມາດດາວໂຫລດໄດ້ຈາກເວັບໄຊຂອງ Microsoft ເອງ ໂຫລດມາແລ້ວໃຊ້ເວລາອີກດົນເຕີບ ກວ່າຈະສາມາດຕິດຕັ້ງຜ່ານໄປໄດ້ ເພາະວ່າຄອມເປັນຄອມລຸ້ນເກົ່າ ເຮັດວຽກຊ້າຫລາຍ ຈົນຄິດວ່າຊິບໍ່ໄດ້ແລ້ວ ແຕ່ຖ້າໄປເກືອບ ໒໐ ນາທີກໍ່ຕິດຕັ້ງຜ່ານ

ການແກ້ໄຂບັນຫາພວກນີ້ ຖ້າບໍ່ມີອິນເຕີເນັດແລ້ວລະຊວຍແທ້ ໆ ຖືກວ່າໂຊກດີຫລາຍທີ່ມີເນັດໃຊ້ 😀

ພັນລາວ.ຄອມ | Punlao.com

ພັນລາວ.ຄອມຫລັງຈາກທີ່ກ່ອນຫນ້ານີ້ໄດ້ຂຽນກ່ຽວກັບໄວໄວນີ້ນັ້ນ ຕອນນີ້ກໍ່ມີຄວາມຄືບຫນ້າໄປແດ່ແລ້ວ ໂດຍມີການເປີດໂຕ ຢ່າງບໍ່ເປັນທາງການໄປໃນ ຊ່ວງຕົ້ນເດືອນທີ່ຜ່ານມາ ເຊິ່ງອັນທີ່ຈິງແລ້ວໂຄງການນີ້ ວາງແຜນມາຕັ້ງແຕ່ຕົ້ນປີ ຈົດໂດເມນປະໄວ້ ເຊົ່າ host ໄວ້ຖ້າ ແຕ່ຫາກໍ່ມີເວລາມາ ຈັດການໃຫ້ແລ້ວຫວ່າງຫລັງນີ້

ພັນລາວ.ຄອມ ເປັນເວັບໄຊຕ໌ຊຸມຊົນທີ່ເປີດໃຫ້ຜູ້ໃຊ້ງານ ສາມາດຮູ້ຈັກກັນຜ່ານທາງ “ໂປຣໄຟລ໌” ຂອງກັນແລະກັນໄດ້ ໂດຍເມື່ອເປັນສະມາຊິກແລ້ວ ຈະສາມາດຂຽນກ່ຽວກັບຕົວເອງ ເຊັ່ນ ຊື່, ອາຍຸ, ເພດ, ທີ່ຢູ່, ບ້ານເກີດ, ໂຮງຮຽນ, ຯລຯ ເປັນຕົ້ນ ເພື່ອສ້າງ Connection ເຊື່ອມຕໍ່ຫາກັນໄດ້ໂດຍມີຫົວຂໍ້ທີ່ໃກ້ຄຽງກັນ (ເຊັ່ນຕ້ອງການຈະຮູ້ຈັກກັບຄົນທີ່ຢູ່ແຂວງດຽວກັນ ຫຼືໂຮງຮຽນດຽວກັນ ຫຼືເກີດປີດຽວກັນ) ຈະວ່າໄປແລ້ວກໍ່ຄ້າຍ ໆ Facebook, Hi5, MySpace ແລະ Social Network ອື່ນ ໆ ທີ່ກຳລັງເປັນທີ່ນິຍົມໃນຂະນະນີ້ ຫາກແຕ່ວ່າ ພັນລາວ.ຄອມ ຈະມີຄົນລາວເກືອບທັງຫມົດ! ທ່ານສະບາຍໃຈໄດ້ວ່າ ສັງຄົມໃນພັນລາວ.ຄອມນັ້ນ ຈະມີແຕ່ຄົນບ້ານເກີດເມືອງນອນດຽວກັນເປັນສ່ວນໃຫຍ່ ກໍ່ຈະມີຄວາມຮູ້ສຶກສະບາຍໃຈກວ່າ ຄືເຮົາຢູ່ປະເທດຂອງເຮົາເອງ : )

ນອກຈາກພັນລາວ.ຄອມຈະມີລະບົບໂປຣໄຟລ໌ແລ້ວ ກໍ່ຍັງມີລະບົບບລັອກ, ກິດຈະກຳ, ກຸ່ມ/ຊົມຮົມ, ອັລບັ້ມພາບ ແລະຫ້ອງສົນທະນາອີກນຳ ແລະ feature ອື່ນ ໆ ເຊັ່ນ forums ສຳຫລັບຖາມຕອບ ແລະແລກປ່ຽນບັນຫາກໍ່ຈະມີມາຕາມຫລັງ

ໃນຊ່ວງ “ທົດສອບ” ຫຼື Beta ນີ້ ກໍ່ຈະພະຍາຍາມປັບປຸງແລະພັດທະນາຫລາຍ ໆ ຢ່າງໃນລະບົບໃຫ້ດີຂຶ້ນ ໂດຍສະເພາະແມ່ນຄວາມເປັນເອກະລັກທີ່ຍັງ ຂາດຫາຍໄປ ເຊິ່ງຄາດວ່າ ຫາກໄດ້ທີມງານມາເພີ່ມກໍ່ອາດຈະບັນລຸເປົ້າຫມາຍໄດ້ໄວຂຶ້ນ (ຕອນນີ້ມີທີມງານແທ້ ໆ ຄົນດຽວຄືຂ້າພະເຈົ້າເອງ 🙁 )

ສຸດທ້າຍນີ້ກໍ່ຫວັງເປັນຢ່າງຍິ່ງວ່າ ພັນລາວ.ຄອມ ຈະໄດ້ຮັບການຕອບຮັບທີ່ດີຈາກບັນດາກຸ່ມຜູ້ໃຊ້ທັງຫລາຍ ຫາກມີຄຳແນະນຳໃດ ໆ ສາມາດຂຽນຄຳເຫັນໄວ້ໄດ້ເລີຍ ຈະຮັບໄປພິຈາລະນາ 😀

no-www

ໂພສຕ໌ສັ້ນ ໆ ແຈ້ງໃຫ້ຮັບຊາບກັນໂດຍທົ່ວເຖິງວ່າ ຕອນນີ້ au8ust.org ປ່ຽນເປັນການເຂົ້າແບບບໍ່ໃສ່ www ນຳຫນ້າແລ້ວ ຫາກວ່າທ່ານໄດ້ລິງກ໌ມາທີ່ບລັອກນີ້ເປັນ http://www.au8ust.org/ ກໍ່ຂໍຄວາມຮ່ວມມືໃຫ້ປ່ຽນເປັນ http://au8ust.org/ ກໍ່ຄື ບໍ່ໃສ່ www ນັ້ນເອງ

ຫາກເຂົ້າທາງ www.au8ust.org ແລ້ວກໍ່ຈະຖືກ redirect ມາທີ່ au8ust.org ໂດຍອັດຕະໂນມັດ 😀

ອ່ານລາຍລະອຽດເພີ່ມເຕີມກ່ຽວກັບ no-www ໄດ້ຈາກ no-www.org

ຮ່ວມລົງປະຊາມະຕິຄັ້ງທີ່ ໑

ຫລັງຈາກທີ່ປະກາດຢ່າງເປັນທາງການສະບັບທີ່ ແລະ ຖືກສົ່ງອອກໄປແລ້ວນັ້ນ ກໍ່ເປັນເວລາກວ່າຫນຶ່ງເດືອນຜ່ານມາແລ້ວ ກໍ່ປະກົດວ່າ ບລັອກຊ່າງມາງຽບເຫງົາສົມຄວາມຄາດຫມາຍ

 

ຈຶ່ງຢາກຈະສອບຖາມບັນດາທ່ານທີ່ເຂົ້າມາຢ້ຽມຊົມບລັອກແຫ່ງນີ້ວ່າ ຕ້ອງການໃຫ້ມີການຂຽນຂ່າວກ່ຽວກັບຄອມພິວເຕີ ແລະເທັກໂນໂລຢີໃຫ້ອ່ານກັນຕໍ່ໄປບໍ່? ຫຼືຢາກຈະໃຫ້ອອກມາເປັນໄປໃນລັກສະນະໃດ?
ເຊິ່ງຄັ້ງນີ້ຖືວ່າ ເປັນການຮ່ວມສະແດງຄວາມຄິດເຫັນຢ່າງເປັນທາງການອີກຄັ້ງຫນຶ່ງ ແລະຢາກໃຫ້ຫມູ່ເພື່ອນ ອ້າຍນ້ອງ ທີ່ຮັກແພງທັງຫລາຍ ຮ່ວມສະແດງຄວາມຄິດເຫັນກັນເຂົ້າມາ ເພື່ອກຳຫນົດເສັ້ນທາງຂອງບລັອກແຫ່ງນີ້ຕໍ່ໄປ…!

 

ຈົບຂ່າວ

 

ປ.ລ. ຢ່າລືມແວະໄປທີ່ກະດານຖາມຕອບ

ປະກາດຢ່າງເປັນທາງການສະບັບທີ່ ໒

ນີ້ຄືປະກາດຢ່າງເປັນທາງການສະບັບທີ່ ໒ ຈາກເວບມາສເຕີ au8ust.org ຂໍແຈ້ງມາຍັງທ່ານຜູ້ອ່ານທຸກທ່ານໄດ້ຊາບທົ່ວເຖິງກັນວ່າ ຂະນະນີ້ທາງເວບໄດ້ເປີດທົດສອບຫມວດ Community ເຊິ່ງຈະເປັນກະດານຖາມຕອບສາລະພັດສາລະພັນບັນຫາຕ່າງ ໆ ຕັ້ງແຕ່ເລື່ອງຄອມພິວເຕີຕະຫລອດຮອດເລື່ອງທົ່ວ ໆ ໄປ ທ່ານສາມາດສອບຖາມບັນຫາຕ່າງ ໆ ກ່ຽວກັບຄອມພິວເຕີ, ເວບໄຊຕ໌, ໄວຣັດ, ອິນເຕີເນັດ, ການອອກແບບ, ປັບແຕ່ງຮູບພາບ, ຯລຯ

ສາມາດເຂົ້າໃຊ້ງານໄດ້ໂດຍການຄລິກທີ່ນີ້

ປະກາດຢ່າງເປັນທາງການສະບັບທີ່ ໑

ນີ້ຄືແຈ້ງການຈາກເວບມາສເຕີຂອງ au8ust.org ຂໍຮຽນໃຫ້ທ່ານທີ່ເຂົ້າມາຢ້ຽມຊົມໄດ້ຮູ້ທົ່ວເຖິງກັນວ່າ ດ້ວຍເຫດຜົນຫລາຍ ໆ ປະການທີ່ເກີດຂຶ້ນນັ້ນ ສົ່ງຜົນໃຫ້ ຂະນະນີ້ທາງເວບໄຊຕ໌/ບລັອກ ແຫ່ງນີ້ ໄດ້ປິດທຳການແລ້ວ ໂດຍບໍ່ມີກຳຫນົດການວ່າເມື່ອໃດຈະເປີດໃຫມ່ອີກຄັ້ງ

ເຖິງຢ່າງໃດກໍ່ຕາມ ທ່ານຍັງສາມາດອ່ານຂ່າວ, ບົດຄວາມ ຕ່າງ ໆ ທີ່ເຄີຍລົງໄວ້ໄດ້ຕະຫລອດເວລາ ລວມເຖິງໃນສ່ວນຂອງ Community ເຊິ່ງເປັນສະຖານທີ່ສຳຫລັບຖາມຕອບບັນຫາຕ່າງ ໆ ນັ້ນ ຍັງຄົງສາມາດນຳໃຊ້ໄດ້ປົກກະຕິ

ແຕ່່ຢ່າລືມວ່າ ທ່ານສາມາດຮ່ວມຂຽນຂ່າວເຂົ້າມາໄດ້ຫາກຕ້ອງການ

ຂໍຂອບໃຈ

ປອມຕົວ

ມີເລື່ອງຊິເລົ່າໜ້ອຍໜຶ່ງ ພໍດີວ່າ ຕອນເຊົ້ານີ້ ບໍ່ຮູ້ຊິໄປເຮັດຫຍັງ ລະຫວ່າງທີ່ກຳລັງຫາວິທີຈັດການກັບບລັອກຫລັກຢູ່ ກໍ່ເລີຍເຂົ້າໄປນັ່ງແຊ່ໃນ Inlao.net ໂດຍສ້າງຫ້ອງ www.au8ust.org ແລ້ວນັ່ງແຊ່ຄົນດຽວ ເພາະບໍ່ມັກໄປສິງສະຖິດຫ້ອງຄົນອື່ນ

ໃນຂະນະທີ່ກຳລັງຈັດການກັບບລັອກຢູ່ນັ້ນເອງ ສະລັບແທບໃນ Firefox ໄປເບິ່ງ Inlao.net ປະກົດວ່າ ມີຄົນໃຊ້ຊື່ດຽວກັນເຂົ້າມາ ມາແລ້ວກໍພິມ icon ຍິ້ມມາ ແລ້ວກໍ່ໄປ ເລີຍນຳໄປເບິ່ງອີກຫ້ອງໜຶ່ງ ໄປເຫັນເພິ່ນ ລາຍນັ້ນກໍ່ເວົ້າໄປຕາມພາສາເພິ່ນນັ້ນລະ ກໍ່ບໍ່ຄິດຫຍັງຫລາຍ ຢູ່ໃຜຢູ່ມັນລະກັນ

ເຫດການນີ້ເຮັດໃຫ້ໄດ້ຮູ້ວ່າ…

  1. ໂອ້ວວວວວ!!! ເຮົາດັງຂະໜາດນີ້ເລີຍ 555+
  2. ລະບົບ chat ໃນ Inlao.net ກະຈອກຢ່າງເຖິງທີ່ສຸດ ບໍ່ຮູ້ຮອດຈຳແນກວ່າຊື່ນີ້ເປັນຊື່ທີ່ມີຄົນລົງທະບຽນແລ້ວ (ແລ້ວຈັກຊິໃຫ້ລົງທະບຽນໄປເຮັດຫຍັງຊັ້ນ?)
  3. ບ້ານເຮົາເລີ້ມມີພວກກໍ່ກວນໃນໂລກ Cyber ແບບບ້ານອື່ນເມືອງອື່ນແລ້ວ ^_^)/

ທຳອິດວ່າຈະຂຽນໄວ້ໃນ *real me ແລ້ວ ແຕ່ວ່າ ເອົາມາແປະໄວ້ບລັອກຫລັກນີ້ແຫລະ ຮຶຮຶຮຶ…