ອອກມາໄດ້ໄລຍະນຶ່ງແລ້ວສຳລັບບໍລິການ Public DNS ຈາກ Google ເຊິ່ງຫາກໃຜເຄີຍໃຊ້ OpenDNS (ອ່ານໄດ້ໃນໂພສເກົ່າ) ກໍຈະພໍລຶ້ງເຄີຍກັນແດ່. Google Public DNS ເປັນບໍລິການຟຣີ DNS ສຳລັບຜູ່ຊົມໃຊ້ອິນເຕີເນັດທົ່ວໄປ ທີ່ທາງ Google ອ້າງວ່າຈະຊ່ວຍເພີ່ມຄວາມໄວໃນການດາວໂຫລດໜ້າເວັບຕ່າງໆ ໄດ້ເປັນຢ່າງດີ ເນື່ອງຈາກ Google ໂດຍປົກກະຕິຈະສົ່ງ spider bot ໄປເລາະຕາມເວັບໄຊຕ່າງໆ ຢູ່ແລ້ວ ຈຶ່ງມີລາຍລະອຽດຂອງ DNS ແລະ cache ຢູ່ເປັນຈຳນວນຫຼາຍ ເຮັດໃຫ້ສາມາດເອີ້ນມາໃຊ້ໄດ້ໄວຂຶ້ນ.

ຢ່າງໃດກໍຕາມ Google DNS ຈະເກັບຂໍ້ມູນການເຂົ້າໃຊ້ເວັບໄຊຕ່າງໆ ຂອງຜູ່ຊົມໃຊ້ໄວ້ ແລະຈະລຶບ IP ທີ່ບັນທຶກໄວ້ນັ້ນອອກພາຍໃນ 48 ຊົ່ວໂມງ ເພື່ອເປັນການຮັກສາຄວາມເປັນສ່ວນຕົວຂອງທ່ານ. ຂໍ້ມູນທີ່ເກັບໄປນັ້ນ ໃຊ້ເພື່ອສ້າງສະຖິຕິຄວາມສົນໃຈໃນເວັບໄຊທີ່ຜູ່ໃຊ້ນິຍົມເຂົ້າເລື້ອຍໆ.

ຂໍ້ແຕກຕ່າງຂອງ Google DNS ແລະ OpenDNS ໂດຍຫຼັກໆ ກໍຄື Google DNS ຈະມີເລກ IP ທີ່ງົດງາມຫຼາຍ ນັ້ນຄື 8.8.8.8 ແລະ 8.8.4.4 ທຽບກັບຂອງ OpenDNS ແມ່ນ 208.67.222.222 ແລະ 208.67.220.220. ຖັດມາກໍຈະເປັນເລື່ອງ feature ທີ່ໜ້ອຍກວ່າ ເຊິ່ງ Google DNS ນັ້ນບໍ່ມີຄວາມສາມາດທີ່ OpenDNS ມີ ເຊັ່ນວ່າ ການບລັອກເວັບທີ່ບໍ່ຕ້ອງການ, ການເກັບສະຖິຕິຕ່າງໆ, ຫຼືການແປງ URL ໃຫ້ເອງເວລາພິມຜິດ ເປັນຕົ້ນ.

ສຳລັບການນຳໃຊ້ Google DNS ນັ້ນ ຜູ່ໃຊ້ສາມາດລະບຸ DNS ຂອງການເຊື່ອມຕໍ່ອິນເຕີເນັດທີ່ໃຊ້ຢູ່ໃຫ້ເປັນ 8.8.8.8 ແລະ 8.8.4.4 ໄດ້ທັນທີ.

ທີ່ມາ – googlesystem.blogspot.com

ຫຼັງຈາກລໍຄອຍມາຍາວນານ (ແລະຕ້ອງລໍຄອຍຕໍ່ໄປອີກຕື່ມ) ມັນກໍໃກ້ເຂົ້າມາແລ້ວ!!

Final Fantasy XIII

ໃນຂະນະທີ່ກະແສ Twitter ໃນລາວກຳລັງຢູ່ໃນຊ່ວງຂາຂຶ້ນເທື່ອລະໜ້ອຍນີ້ ບັນດາປະເທດອື່ນໆ ທີ່ນິຍົມໃນ Twitter ໂດຍສະເພາະຍີ່ປຸ່ນທີ່ນິຍົມ Twitter ຂະໜາດວ່າມີ Twitter ພາສາຍີ່ປຸ່ນນັ້ນ ຕອນນີ້ກໍກ້າວໄປໄກຂັ້ນທີ່ວ່າ ມີການເກັບເງິນໃນການອ່ານຂໍ້ຄວາມ Twitter ແລ້ວ.

ITmedia ລາຍງານຂ່າວຄວາມເຄື່ອນໄຫວນີ້ໂດຍລະບຸວ່າ ທາງ Twitter Japan ຈະເພີ່ມຕົວເລືອກສຳລັບເຈົ້າຂອງບັນຊີ Twitter ໃນການເກັບເງິນຈາກຜູ່ຕິດຕາມອ່ານຂໍ້ຄວາມຂອງຕົນເອງ ໂດຍຈະເປັນການເກັບເງິນແບບລາຍເດືອນ ເຊິ່ງຈະໃຊ້ບັດ Credit card ຈ່າຍ ຫຼືໃຊ້ບັດຕື່ມເງິນກໍໄດ້ (ຄ້າຍໆ ຮັບ SMS ແລ້ວເສຍເງິນຢູ່ບ້ານເຮົາ).

ບໍລິການດັ່ງກ່າວນີ້ຈະເລີ່ມເປີດໃຊ້ໃນເດືອນມັງກອນຕົ້ນປີໜ້າ ເຊິ່ງກຸ່ມທີ່ເໝາະສົມແມ່ນບັນດານັກ tweet ທີ່ໃຫ້ຂໍ້ມູນເລື່ອງຂ່າວສານທັນດ່ວນ, ການສຶກສາ, ຮູບພາບ ຮວມເຖິງວິດີໂອ ແລະຄລິບສຽງເປັນຕົ້ນ. ໃນດ້ານຂອງຄ່າບໍລິການນັ້ນ ອາດຈະມີຕັ້ງແຕ່ 100 ເຢນໄປຈົນຮອດ 1000 ເຢນ ເຊິ່ງທາງ Twitter ຈະຫັກ 30% ເປັນຄ່າທຳນຽມອອກ.

ທີ່ມາ – media.asia, itmedia.co.jp

Nokia PC Suite ເປັນໂປຣແກຣມສຳລັບ ຈັດການໂທລະສັບມືຖືຂອງ Nokia ເຊິ່ງທ່ານສາມາດໃຊ້ເພື່ອ ຈັດການໄຟລ໌ຂໍ້ມູນ ຮູບພາບ ເພງ ແລະວິດີໂອໄດ້ງ່າຍໆ. ນອກຈາກນັ້ນກໍສາມາດ ໃຊ້ແກ້ໄຂລາຍຊື່ contact, ຕິດຕັ້ງໂປຣແກຣມ, ສົ່ງ SMS ຫຼືເຊື່ອມຕໍ່ອິນເຕີເນັດຜ່ານໂຕໂປຣແກຣມ (ໂດຍໃຊ້ມືຖື Nokia) ໄດ້ອີກນຳ.

ສຳລັບ ເວີຊັນໃໝ່ນີ້ ເປັນເວີຊັນ 7.1.40.1 ເພີ່ມຮອງຮັບ Windows 7 ຢ່າງເປັນທາງການ ແລະອັບເດດຄວາມສະຖຽນຂອງໂປຣແກຣມ.

ດາວໂຫລດ Nokia PC Suite ໄດ້ຈາກໜ້າເວັບຂອງ Nokia ທີ່ http://europe.nokia.com/get-support-and-…/nokia-pc-suite ຫຼື direct link ຂອງເວີຊັນນີ້.

via – Wiennat

ຮູ້ສຶກວ່າຈະອອກມາໄດ້ສອງມື້ແລ້ວ ຫາກໍມີເວລາມາຂຽນ .. Ubuntu 9.10 ຫຼືທີ່ຮູ້ກັນໃນລະຫັດ “Karmic Koala” ນັ້ນ ຕອນນີ້ກໍອອກມາໃຫ້ດາວໂຫຼດກັນເປັນທີ່ຮຽບຮ້ອຍແລ້ວ ສາມາດດາວໂຫຼດໄດ້ຜ່ານໜ້າດາວໂຫຼດຂອງ Ubuntu.com ເຊິ່ງກໍມີຄົບຊຸດທັງ Ubuntu, Kubuntu, etc..

ສຳລັບລາຍລະອຽດຂອງເວີຊັນໃໝ່ນີ້ ເບິ່ງໄດ້ໃນ http://www.ubuntu.com/products/whatisubuntu/910features

ອີກຂ່າວນຶ່ງຄື ທາງ Canonical ເຊິ່ງເປັນຜູ່ພັດທະນາ Ubuntu ນັ້ນ ຕອນນີ້ປະກາດວ່າ ຕໍ່ໄປຈະບໍ່ມີ ShipIt ສຳລັບການຈັດສົ່ງແຜ່ນຊີດີ Ubuntu ຟຣີອີກຕໍ່ໄປແລ້ວ ເນື່ອງຈາກເສຍຄ່າໃຊ້ຈ່າຍເປັນຈຳນວນຫຼາຍໃນແຕ່ລະປີ. ຢ່າງໃດກໍຕາມ ທາງ Canonical ກໍຍັງຈະແຍກຊີດີຟຣີໃຫ້ກັບຜູ່ໃຊ້ໃໝ່ (ທີ່ມີ account ໃໝ່) ແລະທີມງານ LoCo ຢູ່.

ທີ່ມາ – Ubuntu.com, Blognone

ໃນຂະນະທີ່ WordPress 2.9 ກຳລັງຖືພັດທະນາຢູ່ ທາງທີມງານເພິ່ນກໍປ່ອຍເດດສຳລັບ WordPress 28.x ມາໃນລຸ້ນ 2.8.5 ແລ້ວ ເຊິ່ງໃນເວີຊັນນີ້ເປັນການແກ້ໄຂລະບົບຄວາມປອດໄພຫຼັກໆ ຢູ່ 2 ຈຸດ ແລະອັບເດດໆ ອື່ນໆ ອີກ 2 ຈຸດ. ທີມງານ WordPress ແນະນຳໃຫ້ຜູ່ໃຊ້ທຸກທ່ານ ຈັດການອັບເດດເພື່ອປ້ອງກັນບັນຫາດ້ານຄວາມປອດໄພທີ່ອາດຈະເກີດຂຶ້ນໄດ້.

ການອັບເດດສາມາດເຮັດໄດ້ຜ່ານເມນູ Automatic Upgrade ຫຼືດາວໂຫຼດໄປອັບເດດກໍໄດ້ເຊັ່ນກັນ. ຫາກເປັນຜູ່ໃຊ້ໃໝ່ ກໍສາມາດດາວໂຫຼດເວີຊັນເຕັມໄດ້ຈາກ http://wordpress.org/download/.

ສຳລັບຂ່າວຂອງ WordPress 2.9 ນັ້ນ ໃນໄວໆ ນີ້ຈະມີເວີຊັນ Beta ອອກມາໃຫ້ທົດລອງໃຊ້ກັນ ແຕ່ຍັງບໍ່ລະບຸເວລາທີ່ແນ່ຊັດເທື່ອ. ໃນ WP 2.9 ນັ້ນທີມພັດທະນາໄດ້ເລັ່ງແກ້ໄຂບັນຫາຕ່າງໆ ທີ່ພົບໃນລຸ້ນກ່ອນໜ້ານີ້ ໂດຍສະເພາະແມ່ນ bugs ທີ່ມີຢູ່ ດັ່ງນັ້ນຈຶ່ງຈະຍັງບໍ່ມີ feature ຫຍັງໃໝ່ໆ ອອກມາເທື່ອໃນເວລານີ້. ສຳລັບໃຜທີ່ສົນໃຈເປັນ beta tester ນັ້ນ ອ່ານໄດ້ເພີ່ມເຕີມໃນ WordPress blog.

ທີ່ມາ – WordPress blog

ຫຼັງຈາກທີ່ກ່ອນໜ້ານີ້ AVG ໄດ້ອອກ AVG Anti-Virus Professional 9.0 ມາແລ້ວ ກໍຕາມມາດ້ວຍ AVG Anti-Virus Free Edition 9.0 ຕິດໆ ກັນ.

AVG Free Edition 9 ນີ້ສາມາດໃຊ້ໄດ້ກັບທັງ Windows XP, Vista ແລະ 7 ໂດຍປະກອບມີຫຼາຍໆ ສ່ວນເຊັ່ນ antivirus, spyware, rootkit protection, email protection, phishing protection ແລະ Linkscanner. ຜູ່ໃຊ້ສາມາດເລືອກໄດ້ວ່າຈະຕິດຕັ້ງ module ໃດຫຼືບໍ່ຕິດຕັ້ງ module ໃດຕາມໃຈ.

ທ່ານສາມາດດາວໂຫຼດ AVG Free Edition 9 ໄດ້ຈາກ http://free.avg.com/ww-en/download?prd=afg#tba2 ມີແບບ web installer ແລະ offline installer ຂະໜາດ 71.2 MB.

ທີ່ມາ – Ghacks

Google ກຽມແຜນເປີດຮ້ານຂາຍປື້ມອອນໄລ ເນັ້ນການຂາຍສົ່ງແລະຂາຍຍ່ອຍ ຢືນຢັນບໍ່ໄດ້ຄຶດເຮັດ ebook reader (ໃນຕອນນີ້) ເທື່ອ.

Google ຜູ່ໃຫ້ບໍລິການຊອກຫາລາຍໃຫຍ່ອັນດັບນຶ່ງຂອງໂລກ ເປີດເຜີຍຂໍ້ມູນຫຼ້າສຸູດໃນການເປີດຂາຍ ebooks ໂດຍຮ່ວມມືກັບຜູ່ຈັດພິມລາຍຕ່າງ ເພື່ອຂາຍປື້ມແບບເອເລັກໂທຣນິກໃນສະບັບ Google Edition ເຊິ່ງລູກຄ້າທີ່ສົນໃຈ ສາມາດຊື້ ebooks ດັ່ງກ່າວນີ້ໄດ້ຜ່ານທາງ Amazon, Barnes & Noble ຫຼືເວັບໄຊອື່ນໆ ທີ່ສົນໃຈເຂົ້າຮ່ວມ. ທາງ Google ຍັງໄດ້ລະບຸວ່າ ຂໍ້ມູນຂອງ ebook ນັ້ນ ຕົນຈະເປັນຜູ່ host ແລະສາມາດຊອກຫາໄດ້ຜ່ານ Google.

Tom Turvey ຕົວແທນຈາກ Google ໃຫ້ຂໍ້ມູນເພີ່ມເຕີມອີກວ່າ ຈະແບ່ງເປີເຊັນໃຫ້ສຳນັກພິມ 63% ແລະທີ່ເຫຼືອຈະເປັນຂອງ Google ໃນກໍລະນີຂາຍຍ່ອຍ ແຕ່ຫາກເປັນການຂາຍສົ່ງໃຫ້ກັບເວັບໄຊຕ່າງໆ ເພື່ອໄປຂາຍຕໍ່ເອງນັ້ນ ສຳນັກພິມຈະໄດ້ 45% ສ່ວນທີ່ເຫຼືອແມ່ນແບ່ງກັນລະຫວ່າງ Google ແລະເວັບໄຊທີ່ນຳປື້ມໄປຂາຍ. ຢ່າງໃດກໍຕາມຈະບໍ່ມີການຜະລິດອຸປະກອນ ebook reader ອອກມາຈັດຈຳໜ່າຍ.

ທີ່ມາ – Yahoo! Tech

ກຳນົດການເດີມແມ່ນຊ່ວງເດືອນກັນຍາ ແຕ່ປາກົດວ່າຫຼ້າຊ້າມາຮອດເດືອນຕຸລາ ໃນທີ່ສຸດ Firefox 3.6 ລຸ້ນ Beta RC1 ກໍອອກມາ ແລະຄວາມສາມາດໃໝ່ໆ ທີ່ເພີ່ມຂຶ້ນມາໃນລຸ້ນນີ້ມີສອງຢ່າງຄື control-tab previews (ຕົວຢ່າງ) ແລະ taskbar thumbnail previews ສຳລັບໃຊ້ໃນ Windows 7.

ສຳລັບທ່ານທີ່ສົນໃຈທົດລອງ ສາມາດດາວໂຫຼດໄດ້ຈາກເວັບໄຊຂອງ Mozilla ຫຼື Softpedia.

ທີ່ມາ – DownloadSquad