CrossOver 8.0 Beta

CodeWeavers ອອກ CrossOver 8.0 ເວີຊັນ Beta ໃຫ້ທົດສອບໃຊ້ກັນ ໂດຍຫຼັກແມ່ນຮອງຮັບ Quicken 2009 ໂດຍສະເພາະ. ນອກຈາກ Quicken 2009 ແລ້ວ ທາງຜູ່ພັດທະນາກໍຍັງພະຍາຍາມປັບປຸງໃຫ້ Internet Explorer 7 ສາມາດໃຊ້ງານໄດ້ດີຂຶ້ນ ແລະໃນສ່ວນຂອງ Microsoft Office 2007 ກໍເຊັ່ນດຽວກັນ. ສຳລັບສິ່ງພິເສດເພີ່ມເຕີມກໍຄື ຕອນນີ້ CrossOver ນັ້ນ ໃນລຸ້ນ 8.0 Beta ມີສຳລັບລະບົບປະຕິບັດການ Solaris ແລະ BSD ອີກນຳ ນັບວ່າເປັນກ້າວໃໝ່ຂອງ CrossOver ອີກຂັ້ນ ທີ່ຈະເປີດຊ່ອງທາງໃຫ້ໃຊ້ໂປຣແກຣມສຳລັບ Windows ໃນລະບົບປະຕິບັດການທີ່ບໍ່ແມ່ນ Windows.

ທີ່ມາ – CrossWeavers blog

Windows 7 RC ມາແລ້ວ

Windows 7 RCຫຼັງຈາກທີ່ອອກ Beta 1 ແລະ 2 ໄປໄດ້ໄລຍະນຶ່ງ ທາງ Microsoft ກໍອອກລຸ້ນ RC ຫຼື Release Candidate ຂອງ Windows 7 ມາໃຫ້ດາວໂຫຼດກັນແລ້ວ. ໃນເບື້ອງຕົ້ນນັ້ນ ຜູ່ທີ່ຈະສາມາດດາວໂຫຼດໄປທົດລອງໄດ້ ຕ້ອງເປັນ partner ທີ່ໄດ້ຮັບການຄັດເລືອກເທົ່ານັ້ນ ສ່ວນບຸກຄົນທົ່ວໄປ ຈະສາມາດດາວໂຫຼດມາທົດລອງໃຊ້ໄດ້ ແມ່ນພາຍໃນວັນທີ 5 ພຶດສະພາທີ່ໃກ້ຈະເຖິງນີ້.

ແຫຼ່ງຂ່າວຄາດການວ່າ ຫຼັງຈາກທີ່ເປີດໃຫ້ດາວໂຫຼດບໍ່ດົນ Windows 7 RC ນີ້ຈະຖືກປ່ອຍໃຫ້ໂຫຼດຕາມເວັບໄຊ BitTorrent ຕ່າງ ໆ ອີກເຊັ່ນເຄີຍ.

ທີ່ມາ – Ghacks.net, Windows7News.com

ກວດສອບການຕິດໜອນໄວຣັດ Conficker

Conficker ເປັນໜອນໄວຣັດທີ່ຖືກກວດພົບໃນຊ່ວງປາຍປີ 2008 ເຊິ່ງເປົ້າໝາຍການໂຈມຕີຂອງ Conficker ແມ່ນລະບົບຄອມພິວເຕີທີ່ໃຊ້ Windows 2000, XP, Vista, Server 2003 ແລະ Server 2008 ຮວມເຖິງ Windows 7 beta ກໍຖືກຄຸກຄາມເຊັ່ນກັນ.

ໜອນໄວຣັດ Conficker ອາໄສຄວາມຜິດພາດທີ່ມີໃນ network stack ຂອງລະບົບປະຕິບັດການ ດັ່ງທີ່ກ່າວມາຂ້າງຕົ້ນ ໃນການແຜ່ຕົວເອງເຂົ້າໄປໃນລະບົບ ເຊິ່ງພາຍຫຼັງການກວດພົບ Conficker ໄດ້ນຶ່ງເດືອນ ກໍມີການຄົ້ນພົບຄວາມຜິດພາດໃນ network stack ຂ້າງຕົ້ນ ແລະນຳໄປສູ່ການແກ້ໄຂໃນພາຍຫຼັງ. ແຕ່ຢ່າງໃດກໍຕາມ, ຈົນຮອດຕອນນີ້ມີລາຍງານວ່າ ຄອມພິວເຕີທີ່ຕິດເຊື້ອໜອນໄວຣັດດັ່ງກ່າວ ມີຈຳນວນສູງເຖິງ 15 ລ້ານເຄື່ອງທົ່ວໂລກ.

ທ່ານສາມາດກວດສອບສະຖານະລະບົບຄອມພິວເຕີຂອງທ່ານໄດ້ໂດຍການເຂົ້າໄປທີ່ http://www.confickerworkinggroup.org/infection_test/cfeyechart.html ແລ້ວສັງເກດຮູບໃນໜ້າເວັບດັ່ງກ່າວ ຈະພົບວ່າມີຮູບພາບຈຳນວນ 6 ຮູບສະແດງຢູ່ ຫາກທ່ານບໍ່ເຫັນຮູບພາບດັ່ງກ່າວ ຫຼືເຫັນບໍ່ຄົບ ຈະຕີຄວາມໄດ້ດັ່ງລຸ່ມນີ້:

ຮູບທີ່ປາກົດ ຄວາມໝາຍ
All images displayed ສະພາວະປົກກະຕິບໍ່ຕິດໜອນໄວຣັດ Conficker ຫຼືໃຊ້ງານຜ່ານ Proxy
Security/AV logos not displayed ຕິດໜອນໄວຣັດ Conficker ສາຍພັນ C ຫຼືລຸ້ນໃໝ່ກວ່າ
Some security/AV logos not displayed ຕິດໜອນໄວຣັດ Conficker ສາຍພັນ A/B
No images displayed ອາດຈະເປັນໄປໄດ້ວ່າ ຕັ້ງຄ່າ browser ບໍ່ໃຫ້ສະແດງຮູບພາບ ຫຼືເປັນເພາະເນັດຊ້າຈຶ່ງບໍ່ໂຫຼດຮູບມາສະແດງ

ທີ່ມາ – ConfickerWorkingGroup.org, Wikipedia

ແປງໄຟລ໌ໃຫ້ເປັນ ISO

AnyToISOມື້ນີ້ມາແນະນຳໂປຣແກຣມ AnyToISO ເປັນໂປຣແກຣມສຳລັບປ່ຽນໄຟລ໌ MDF, BIN, DMG, IMG, CDI, NRG, DAA, UIF ແລະ B5I ເປັນ ISO ໄດ້. AnyToISO ມີທັງເວີຊັນແຈກຟຣີ ແລະແບບເສຍເງິນ ສາມາດໃຊ້ໄດ້ທັງ Windows ແລະ Mac OS.

ໃນເວີຊັນ Professional ເຊິ່ງຕ້ອງເສຍເງິນຊື້ນັ້ນ ຈະສາມາດ convert ເປັນ DVD ໄດ້ນຳ

ສາມາດດາວໂຫຼດໄດ້ຈາກ Link ດ້ານລຸ່ມ:

Internet Explorer 8 Final

ເຄີຍຂຽນໄປກ່ອນໜ້ານີ້ແລ້ວກ່ຽວກັບ IE8 (ຂ່າວເກົ່າໃນ RC1 ແລະ Beta 2) ເຊິ່ງຕອນນີ້ Microsoft ປະກາດອອກແລ້ວ Final version ສຳລັບໂປຣແກຣມທ່ອງເວັບທີ່ມີສ່ວນແບ່ງຕະຫຼາດຫຼາຍທີ່ສຸດໃນປັດຈຸບັນ “Internet Explorer 8”

ໃນເວີຊັນ “Final” ກໍ່ຄ້າຍ ໆ ກັບທີ່ອອກມາກ່ອນໜ້ານີ້ ໂດຍຈະເປັນການແກ້ໄຂ bugs ຕ່າງ ໆ ທີ່ມີ ສ່ວນ feature ໃໝ່ນັ້ນ ກໍ່ຄືກັບທີ່ລາຍງານໄປກ່ອນໜ້າ ມີ private browsing mode, automatic crash recovery ແບບດຽວກັບໃນ Firefox, ການປ້ອງກັນ XSS, ແລະ SmartScreen filters. ນອກຈາກນັ້ນກໍ່ມີສ່ວນເສີມທີ່ເພີ່ມເຂົ້າມາໃໝ່ເຊັ່ນ Accelerators ທີ່ຊ່ວຍໃຫ້ສາມາດເຂົ້າເຖິງບໍລິການຕ່າງ ໆ ໄດ້ໄວຂຶ້ນ.

Internet Explorer 8 Final ມາພ້ອມກັບ 25 ພາສາໃຫ້ເລືອກດາວໂຫຼດ (ແນ່ນອນບໍ່ມີພາສາລາວເທື່ອ) ສາມາດດາວໂຫຼດໄດ້ຈາກເວັບໄຊຂອງ IE8 ຫຼືຄລິກໂຫຼດຈາກລິ້ງດ້ານລຸ່ມ

ດາວໂຫຼດ:

Firefox 3.0.7

ອອກເວີຊັນໃໝ່ແກ້ໄຂ bugs ແລະລະບົບຄວາມປອດໄພຕໍ່ຈາກເວີຊັນກ່ອນໜ້ານີ້ ຮວມເຖິງແກ້ບັນຫາສຽງໃນເວີຊັນສຳລັບ Mac OS X ທີ່ລົງ Flashblock ອີກນຳ. ຂໍ້ມູນເພີ່ມເຕີມແບບລະອຽດ ສາມາດເບິ່ງໄດ້ຈາກ Bugzilla

ແລ້ວກໍ່ອີກຢ່າງນຶ່ງ ເວີຊັນນີ້ມີ Localization build ເພີ່ມໃໝ່ ໓ ພາສາຄື Estonian, Kannada, ແລະ Telugu ສ່ວນພາສາລາວ .. ຍັງບໍ່ມີໃຜແປ -_-)..

ຫາກມີ Firefox ຢູ່ແລ້ວ ສາມາດອັບເດດໂດຍການໄປທີ່ເມນູ Help > Update ຫຼືໂຫຼດມາໃໝ່ຈາກເວັບໄຊຂອງ Firefox

Polyglot 3000 ບອກພາສາທີ່ຢາກຮູ້

Polyglot 3000Polyglot 3000 ເປັນໂປຣແກຣມສຳລັບກວດສອບວ່າ ຂໍ້ຄວາມໃດນຶ່ງນັ້ນເປັນພາສາຫຍັງ ເຊິ່ງສາມາດ ກວດສອບໄດ້ຫຼາຍເຖິງ 474 ພາສາໃນໂລກນີ້ ຮວມເຖິງ ພາສາລາວອີກນຳ.

ໂປຣແກຣມ Polyglot 3000 ສາມາດດາວໂຫຼດມາໃຊ້ໄດ້ຟຣີ ຮອງຮັບລະບົບ Unicode ເຕັມຮູບແບບ (ບໍ່ໍດັ່ງນັ້ນຄົງຈະຮອງຮັບພາສາ ບໍໄດ້ຫຼາຍປານນີ້ :P)

ດາວໂຫຼດໄດ້ຈາກ Polyglot3000.com

ທີ່ມາ – Ghacks.net

SMF 2.0 ຈະພາມາພ້ອມ “Curve”

ຫຼາຍຄົນແຖວນີ້ອາດຈະຄຸ້ນຊື່ SMF ຫຼື Simple Machine Forums ກັນມາແລ້ວ ມັນຄືລະບົບເວັບບອດ ຫຼືກະດານສົນທະນາທີ່ໄດ້ຄວາມນິຍົມເປັນອັນດັບຕົ້ນ ໆ ຂອງໂລກ ເຊິ່ງຫຼ້າສຸດໄດ້ມີປະກາດກ່ຽວກັບ Theme ຫຼືຮູບແບບໜ້າຕາໃໝ່ ເຊິ່ງຈະມາພ້ອມກັບເວີຊັນ 2.0 RC2 (ຕອນນີ້ອອກມາຫຼ້າສຸດແມ່ນ 2.0 RC1) ໃນໄວ ໆ ນີ້ ໃຫ້ຊື່ວ່າ “Curve”.

ໂດຍຫຼັກແລ້ວ Curve ຈະຖືກປັບແຕ່ງອອກແບບມາເບິ່ງສະບາຍຕາກວ່າເກົ່າ, ປ່ຽນໄປໃຊ້ລະບົບເມນູແບບແຖບ drop-down ແທນ, ປັບປຸງການອອກແບບໂດຍ XHTML ແລະເພີ່ມການນຳໃຊ້ CSS ໃຫ້ຫຼາຍແລະເໝາະສົມຂຶ້ນ. ຢ່າງໃດກໍ່ຕາມ SMF 2.0 RC2 ກໍ່ຍັງບໍ່ມີກຳນົດການເທື່ອວ່າຈະອອກມາມື້ໃດ. ຂໍ້ມູນເພີ່ມເຕີມແລະຮູບປະກອບສາມາດເບິ່ງໄດ້ຈາກແຫຼ່ງຂ່າວ.

ທີ່ມາ – SMF Community

ສຳລັບໃຜທີ່ສົນໃຈຮ່ວມແປ SMF ໃຫ້ເປັນພາສາລາວ ຂໍເຊີນເຂົ້າຮ່ວມໄດ້ທີ່ LaoSMF.com ເດີ້ ຕອນນີ້ແປໄດ້ເກືອບ 50% ແລ້ວ 🙂

ຕິດຕັ້ງ WLM ແບບເບົາ ໆ

ຂຽນໄວ້ກັນລືມ .. ໄດ້ຂໍ້ມູນຈາກ @Defago ວິທີຕິດຕັ້ງ Windows Live Messenger (a.k.a. WLM) ແບບເບົາ ໆ ເພາະໂດຍປົກກະຕິແລ້ວ ເວີຊັນຫຼັງ ໆ ຂອງ WLM ຈະມີຂະໜາດໄຟລ໌ໃຫຍ່ເຖິງ 130MB+ ເຮັດໃຫ້ຄົນເນັດຊ້າເກືອບຈະໂຫຼດກັນບໍ່ໄດ້ເລີຍ ເພາະມັນຍັດສາລະພັດຢ່າງມາໃຫ້ໃນ package ການຕິດຕັ້ງແທນທີ່ຈະມີພຽງ WLM ຢ່າງດຽວຄືແຕ່ກ່ອນ.

ວິທີການຕິດຕັ້ງແບບເບົາ ໆ ແມ່ນດາວໂຫຼດໄຟລ໌ຂອງ WLM ເວີຊັນທີ່ຕ້ອງການມາຈາກ Pank.org IM ເຊິ່ງໃນຕອນນີ້ເວີຊັນຫຼ້າສຸດແມ່ນ 14.0.8064.206 ກໍ່ເລືອກໂຫຼດ Windows Live Messenger 14.0.8064.206 (English) ມາ ມີຂະໜາດໄຟລ໌ພຽງ 24.9MB ເທົ່ານັ້ນ.

ຫຼັງຈາກໂຫຼດມາຮຽບຮ້ອຍແລ້ວ ຫາກວ່າໃນຄອມພິວເຕີຂອງທ່ານຜູ້ອ່ານມີ WLM ເວີຊັນເກົ່າຢູ່ກ່ອນແລ້ວບໍ່ວ່າຈະເປັນເວີຊັນໃດ ໆ ກໍ່ຕາມ ໃຫ້ Uninstall ແປວ່າຖອນການຕິດຕັ້ງອອກກ່ອນ ກໍ່ເຮັດໄດ້ຫຼາຍວິທີເຊັ່ນ ໄປທີ່ Control panel ເຂົ້າໄປ Add/remove programs ແລ້ວເລືອກ Uninstall Windows Live Messenger ຫຼືອີກວິທີທີ່ຜູ້ຂຽນໃຊ້ຕາມຄຳແນະນຳຂອງສະຫາຍ Defago ແມ່ນໃຊ້ໂປຣແກຣມ ZapMessenger ສາມາດດາວໂຫຼດໄດ້ຈາກເວັບ MessengerGeek ແຕ່ໂປຣແກຣມດັ່ງກ່າວຕ້ອງມີ .NET Framework 2.0 ກ່ອນຈຶ່ງຈະໃຊ້ໄດ້ ດັ່ງນັ້ນຖ້າໃຜບໍ່ມີ ຫຼືບໍ່ແນ່ໃຈວ່າມີບໍ່ ຂໍແນະນຳໃຫ້ Uninstall ແບບທຳອິດແທນ.

ເມື່ອ Uninstall ຮຽບຮ້ອຍແລ້ວກໍ່ເປີດໄຟລ໌ທີ່ໂຫຼດມາຕອນທຳອິດທີ່ວ່າ 24.9MB ກໍ່ຈະເຂົ້າສູ່ຂັ້ນຕອນການຕິດຕັ້ງ ໃຫ້ຈັດການຕິດຕັ້ງໄປຕາມເລື່ອງ ຄລິກ Next ຢ່າງແນ່ວແນ່ແລະໝັ້ນຄົງ ບໍ່ດົນຈະປະກົດວ່າເຫຼືອແຕ່ Finish ໃຫ້ຄລິກ ຈັດການໄປຕາມນັ້ນເປັນຈົບພາລະກິດ.